2009 KRISMAS

NA CHHÔH TAWHTA RYUREIHTUHPA VAW PUA TLÔH AW TA

BY

Rev. Dr. L. B. Siama

Principal, Lorrain Theological College, Yangon

25.12.2009

Nâ Bethlehe, Zudah rah liatapa,

Zudah ryuteihtuhpazy hry liata chyh chai cheita aw va chi;

Na chhôh tawhta ryureihtuhpa pua tlôh aw ta.

Israel ei chyhsazy a vaihtuh awpa cha,

tahpa ta ropa châ tlôh ta.

(Mathai 2:4)

1. Biehmiapa

2009 Krisma biepipa cha “Na chhôh tawhta ryureihtuhpa pua tlôh aw ta” tahpa a cha. He bie he Thatihpha Mathai ta Mika 5:2 bie  a la pachhuahpa a cha. Mika châbuy liata cha “Na Bethlehe Ephrata” tahpa a cha. Bethlehe tahpa moh yzie cha “Viachha o” (house of bread) tahna a cha. Ephrata he rah pachhaihna (bia) moh cha ta, Marara duahmo a cha khiah cha, Patheitlah, Tihrotlah, Hrokeitlah, Kahrietlah nata Sawhmotlah tahpa nata a lyu aw.   Bethlehe he kha hlâ tawhta Davi Khihpi tlyma, Ephrata tahpa tlyma ama vaw aw tyhpa a cha.

Mararah Mawhtâhna vata chakâh chaina kô, niepa nata do awpa rai a yleina daihti, Sawvâ nata beipari liata sah nata sapha a yleina daihti liata “viachha o” tawhta “ryureihtuhpa a vaw pua aw” tah thla hâpa cha “Marara tawhta ryureituhpa pua thai va vei” tahna a cha va tlyma? Khapa vata ma Mara Awnanopa heta 2009 Krismas biepipa châta he bie he a vaw tlyh vâ tly? tahpa he ei pachâ tyh hra. Nie nata do, phusa nata taka a hneipazy heta ryu ama reih aw, tahna a cha vâ tlyma? Khitlah nata awnanopa lia heta dyhchhie sipasapazy heta ao parosa aw vei ei, tahna a cha va tlyma? tahpa pachâpa ta he sermon pachhohpa ei vaw roh hrapa a cha.

2. Zudah rah Bethlehe khih

Rei chiehpa hawhta Bethlehe tahpa cha “viachha O” tahna cha ta, Marara duahmo ta cha “sawva, beipari” tahna cha aw ta “niedo ati avyna su” tah thei awpa a cha aw. Zerusalem chho lâ me 5 liata a ypa cha ta, tahma chyhsa 35,000 ama pahrana su a cha. Bethlehe khih tlô chy heta Rekheli thlâsu y ta, he khih he Boaza nata Ruthi ama tyhna su chhao a cha hra. Hrohsopa Mika daihti liata cha Zudah rah he Babylon seichana lâta ama china daihti a châ. Mohropa ku ry liata ama yna daihti a chapa vata Zu chyhsazy ama nawh chaina daihti chhao a cha. Amo châta hnabeiseihna rai ama hnei leina daihti a cha. Cha hawhpa daihti liata Hrohsopa Mika ta “Nâ Bethlehe Ephratha, Zudah rah liata chyh chai hrala, Na chhôh tawhta ryureihtuhpa pua tlôh aw ta (Mika 5:2)” a vaw tahpa heta Isarel châta hnabeiseihna hro ama pahneisapa a cha. Anodeikua cha:

2.1 Bethlehe cha viachha O tahpa cha taraw ta a chhôh liata pahrapazy ama chakâh

Ryureihtuhpazy daihti liata Bethlehe liata chakâhna thata a tlô. Chavata Elimeleka chhôhkha chhao niedo yna su Moaba rah lâ ama paih haw. Elimelka lapinô cha Naomi cha ta, cha cha “Thapha” tahna a cha. Moaba rah liata Elimeleka nata a sawchapaw pa 2 zy cha thi ha ei ta, Naomi nata a myunô pa 2 deita ama y haw. A my nô pakha chhao ta a nôpaw O lâ a die haw. Ruthi deikua cha a nohnô hnohta “ Na siena maih sie aw nata, na chyhsa cha ei chyhsa ama cha hra aw. Na Khazohpa cha ei Khazohpa a cha hra aw” tahpa ta Naomi hnohta a pazi lyma. (Ruthi ). Naomi cha a myunô Ruthi nata Bethlehe lâ ama vaw kua. Bethlehe nôzy chata Naomi ama hmô tita, “He he Naomi (thapha) kha cha vei ma?” ama tah. Naomi ta “thapha” na tah khu u, Marâ (Khanô) tlao na tah teh u” a tah. Bethlehe liata y taraw ei ta, niepa nata dopa ativy vei ei; ama thapha thei leipa ta ama hrona chhao akha ama tah ngasa.

Chahawhla khihnarah liata Ruthi cha Boaza nata eima tyh. Sawchapaw khohchhih kawpa ama vaw hnei. Bethlehe nôzy ta Naomi ta samoh avaw hneipa cha he hawhta ama lykhei; “he na samoh he saw pasari hlata hmo a taothei via aw; na hrona chhao a taopathi aw; ano he nâ bohna a cha aw” tahpa ta a moh cha OBEDA ama bi. Ruthi nata Boaza atyhna heta pachhatuhpa vaw pina liata hmo peimawh kawpa a cha. Boaza heta Obeda sat a, Obeda ta Zese sat a, Zese ta Davi sa ta,Davit a Sawlawmaw a sa. Cha Salawmaw tawhpa pathla liah lymapa cha ta, Pachhatuhpa Zisu cha a vaw pihpa a cha.

Chavata Viachha O ama tah tyhpa Bethlehe cha chakâhna su vaw châ hrasala, he chhôh tawhna heta Zisu Krista vaw pina awpa pathlatuhpa Boaza nata Ruthi ama tyhna su a vaw châ thla haw.  A chakâh tyhpa, a viavipa, sipasapa, mohnaopa, nawhtâpa ta ypa nata mâchhiesa tyhpa chhôhkha tawhta Ryureihtuhpa cha a vaw pua thei thlah hapa he sipasapazy châta Zisu cha thatihpha a chazie a palasapa a cha.

2.2 Bethlehe he mâchhiesana su chhao a cha hra (Athao 35:19)

Bethlehe khih tlô chy, lâkiah liata Rekheli thlâsu a y. Zakaw ta Rekheli chô liata sawchapaw pa 2 – Zawsi nata Bejamin a sa. A seihnaipa a pi nota Rekheli cha a thi haw. Chavata a sawchapaw seihnaipa chhao Ben-oni (Rietheina saw) tahpa ama bi. Cha hnô lâta Benjami (ei ku chachâh lâ saw) tahpa moh ama pathlaipa a cha. Rekheli thlâsu heta “ei rietheina hro” tao ta, cha hawhpa daihti liata “ku chachah lâta thatlôna hro” chhao a vaw puapa a cha.

BC 586 kô Babylon ta Zudah seichana lâta a chhi nota, Israel mo cha Rekheli thlasu he chapiapa ta seichana lâ ama sie tahpa a cha. Rekheli mâchhie a sa lyma chy, tahna a cha. Zisu pina daihti liata abei Herawda heta chapaw kô 2 tawh ary lâ tahpazy a thiepa vata he Bethlehe he mâchhiesana su a cha lyma thla haw. Chahrasala he mâchhiesana su tawh heta Thlahlôhna Beipa cha a vaw pihpa a cha.

Thina vata mâchhiesapa, vâsâhpa nata rairuna hluhpi a tyhpazy he Rekheli hawhta mâchhiesapazy ama cha aw. Cha hawhpazy tawhta chhao Zisu thlapalôhtuhpa a vaw pih thei thla hra. Hro eima tyhpazy he chyhsa hropazy chakao nawpa châta a châ.

3. Bethlehe liata Bei Zisu a vaw pih.

Hrohsopazy ta ama vaw chhochhilipa Messiah (Zisu) cha Bethlehe liata a vaw pi nahta Mietaku vaihtuhpazy nata Nochhi chyhsa sopazy heta Bei Zisu cha anaohpa ta chibaih ama bu. Cha cha Krismas hmiatua chaipa tah theipa a cha aw. Chahrasala kô 200 chhôh Bethlehe cha ngiapa leipazy ku liata a y thla haw. Chhochhilipa hawhta thlai vaw tlô tyh vei.

Awnanopa a vaw dua tawhta kô hluhpi chhôh Krismas hmâ thei vei ei. Rawma rah liata cha “mitre” ama tahpa Noh-khazohpa (Sun-god) ama chhyna daihti cha ta, Cha mitre (noh-khazohpa) ama palyupalihna noh cha December 25 nohta a cha, ama tah. Rawma rah he Krizyhna lâta a vaw palie nahta AD 336  “Awnanopa Krismas” hmiatua chaipa cha ama vaw hmah haw. Kha hlata noh-khazohpa ama chhyna noh kha “chônô chaipa Zisu-Khazohpa pina noh ta ama vaw hmâh haw. Chatawhta AD 339 May 1 nohta Zisu pina su Bethlehe liata “Zisu Pina Achhyna O” chhao sapa a vaw cha haw. Chatawhna chata tanoh taihta Krismas he aly kawpata eima vaw hmah lymapa a cha.

(Dec 25 noh he Zisu pina noh cheingei a cha/cha leipa pahno thei khao mapi. He pahno leina heta Dec 25 he Krisama noh châ vei, tahna châ vei; khizaw pôhpalôpa ta Krismas noh ta a vaw rao hawpa cha keimo chhao eima ly hra awpa a cha).

Eima viachha O (py palyna raihriana su) he Bethlehe a cha aw. Kha hlata cha su cha khizaw kawpata sapa palysana châta vaw hmâ hra ei sila, tahma deikua cha Bei Zisu vaw pina su, Khazohpa parônahsana su châta eima vaw hma theina he Krismas tahpa a cha aw. Krizyh hlâta Sata lâta atheihna eima hla tyhpa noh kha, tanoh cha Zisu lâta atheina eima hlana noh a vaw cha ha aw.

3.1 Zisu cha Bethlehe a cha (Zawhana 6:35)

Zisu cha Bethlehe (viachha O) liata a pihpa deita châ leipata, ano cha hrona Bethlehe (hrona viachha) a cha. Ano tlaita “kei he hrona viachha ei châ; ei hnohta a vypa cha ahyhmah ta ama nodi aw vei (Zhn 6:35)” a tah. Cha dei châ vei; Bei Zisu ta –

1. Kei he Hrona viachha ei châ (Zhn 6:35)
2. Kei he Khizaw khaipa ei châ (Zhn 8:12)
3. Kei he Ochhi ei châ (Zhn 10:8)
4. Kei he Mietaku vaihtuh phapa ei châ (Zhn 10:11)
5. Kei he Thyuheihna nata hrona ei châ (Zhn 11:25)
6. Kei he Lâthlôh nata Biehmeiseihpa nata Hrona ei châ (Zhn 14:6)
7. Kei he Kreszôh ei châ (Zhn 15:5) a tah.

Zisu Krista hneina he ato hneina châ ta, Zisu kyna he ato kyna a châ aw. Chavata Bethlehe lâta sie ei suh u, tahpa cha Zisu Krista pangaih suh u, tahna a cha aw. Zisu hnohta a pangaihpazy chata “Zisu ta ei châ” a tahpa zydua ama ngiahna hawhta piepa ama cha aw.

3.2 Bei Zisu cha Hrona kipa (hrona hluhpi) hnawh a cha

Bei Zisu ngiapâna he thina khôlâ châ deita cha vei. He khizaw hrochhôh liata hma thei awpazy tlao a cha. Ano cha hrona hluhpi (kipa) hnawh châ tlôh ta (Zhn 10:10). Eima nohto hro liata hrona aki khao lei tita eima hrona miah pakituhpa, patlohtuhpa cha Bei Zisu deita he a cha. Bei Zisu cha:

1. Dahphipazy châta hrona ti hnawh a cha (Zhn 7:37)
2. No-âhchhihna taihta ryhraotuhpa a cha (Isaih 9:6)
3. Adyhna Beipa a cha (Isaih 9:6)
4. Tlah leipazy (Hri-iah hneipa zydua) châta tlâhna (Maka 1:34)
5. Nodipazy châta ribiena a cha (Zhn 6:11-12)
6. Thlahpa lâta chiehleipazy ngiathaina a cha

Saya Taisa (tahma tah Dr. Sasa) heta 2007 Krismas he Lialaipi liata hma awpa khoh ta, ano a tlô thei lei awpa vata ano vyuhpata Krismas hma khei awpata miah a hruapa vata Lialaipi liata Krismas ei hmâh. Dec 28 noh tawhta Kôthieh taih pazaopa a cha. Kô parohpa pathlieza ta Evan. Ebi (Khaitlai Paw) ta Music pho 100 ta Khazohpa palyupalih awpa a chhuah. Chavata ano o tlyhmia liata dawhkho, viadaw, paotlah, Meithei, khoh, … hpz. ano o chhôh museum liata a ypa zydua hmapazy music 100 ta reithaipa a tao. Zacho dawh 12 liata music pyu ngiapa 100 a vaw paro thlahapa cha Lialaipi khih zydua a chathopathla ngapa hawhta a cha. A rônazie reitheipa cha vei.

A myla apakhyna liata Pinô Khaitlai nô ta alyna bie a reipa he ei palôh eina hria kaw.

“Keima nata Khaithlai paw eima hnei no he sipasa ngasa pita, khapa hmah ta hnei mapi. eima hnei chhôhpa cha bei kiahchopa, thobyh chypa, aphie châta hmapa savokyh nata poh miakha deita he a cha. Tanoh he hawhta Music pho 100 ta eima tlyhmia liata Khazohpa reithai thei awpa a vaw châ thlah hâpa he keimo vata châ tiarah leipata Khazohpa hneirôhna nata ngiachhiena vata deita a cha” Zis cha Bethlehe a chana a vaw chakhei hra.

Hrona hluhpi a pietuhpa cha Bei Zisu he a cha.

4. Bie pachhana

Bei Zisu ta, “nama hry liata ahyrai rônah chaipa ta a y khohpa chata, nawh chaipa ta a ytua awpa a cha” a tah. Zisu Krista liata yna cha athaona liata cha anawh chaipa hawhta â lâ tyh. Chahrasala a chaolahmei châ beih vei; luhpa tlao a cha tyh. Bethlehe cha Zudah rah liata nawh chaipa hawhta ala hra sala, ryureihtuhpa a vaw puana a chapa vata rônah chaipa a vaw châ haw. Bei Zisu cha Bethlehe khih viachao O liata nawh kawpata vaw pih hrasala, khizaw zydua ryureihtuhpa a vaw cha haw. Zisu cha moleipazy hawhta tho chhiesana liata taolapa ta y hrasala, moh zydua hry liata moh chônô chaipa “ZISU KRISTA CHA BEICHAIPA A CHA”  tahpa moh bipa a cha.

Hy, nâ Nâ Bethlehe, Zudah rah liata chyh chaichai khao va chi!

Na chhôh tawhta ryureihtuhpa avaw pua hawpa vata! Halleluiah.

Eima hrona chô liata ahy e ryureih?

KYH TO LIATA BEI ZISU HNEITUHPA CHA CHYU EI SUH U.

36

1.   Nathlie vâ Bei saw cha, Bethlehem viahchao o lia

Nawh hawh apyhpa ta a vaw pih;

A bei rôhnahna vâ dyuchhai za siesai ta,

Miah chatlaipa viahchao o nawhpa lia a pih.

Eimâ châ ly, lei nah vâ Bei rôhnah,

Reithai hla thata eima sa aw;

Mohnaopa nah rietheizy Beipa,

Hlâno Bethlehem liata su y leipa kha,

Tahmâ deikua eima hry liata su a y.

2.   A pina su riethei Bethlehem dei leipa cha,

A châta su hropa y tlôh va;

A luh â ziana Bethlehem viahchao o nawh,

Lei beizy nah a chyhsazy ta khoh tlôh va.

3.   Bei chônô su chônô chai pahrâ tawh Beipa Zisu,

Lei beizy ta ano dyuh hr’eisa;

Kei châ deikua cha Bei khochhih chai châ chi ta,

Viavi sawzy lyna Beipa vaw pihpa hi.

4.   Hlâno Eden sadôh lia hrona eima pahlei,

Tahmâh Beipa ta miah pie heih ta;

A bie tawh puapa viavi saw miah palôhtuh,

Deiva awhsi hlâta â ngia via Beipa cha.

5.   Hlâno Bethlehem liata na châta su y vei,

Nâ, mopathaih vâ Bei pi nawpa;

Tahmâ deikua he liata na châ su a y,

Zisu eima hnoh pahrâ la, miah ypâ teh.

000000000

Biehmiapa

A para kawpata asie haipa atanoh khizaw liana heta, eima hrona chata hmo tei chyu pita, cha hmo eima teipa liata pi a tloh theipa nata theileipa eima y. Khizaw he hmo eima khopa eima teina (raihriana)pa lyu cha ta, he liana he ta, thluahruapata vaw pih chyu pita, chahrasala hro chhoh eima duahmo alyu tla vei. Ahnei viapa, athai viapa, achhaohrah viapa, hmotaothei viapa tahpazy ta eima hlie holo. Chakhiahla, biehrai kao la tawhta he yzi achu (novah) thei nawpata Kana lata mohparutuhpazy thatih Malureina 13-14) saipazipa ta sermon[1] sakha ei vaw thyu hra aw.

Rah mohparu awpata tuapa na cha

Israel sawzy Izi rah tawhta ko hluhpi rahpathopa liata vaw sie ei ta, Kana rah ama tlo ba awpa vata, pho kha tawhta ngachhihpa pakha chyu thua eita, Kana rah moparu awpata tuapa ama cha (13:1-16). Cha liata biepiepazy cha:

(1) Rah mohparu awpa he biepi chaipa a cha (13:17). “Mohparu” tahpa hawhrawh he English ta “survey” or “investigate” or “research” ama tahpazy yzi alyupa a cha aw “alaichadai” tahna yzi ahnei. Rah yzi nata duahmo achu awpa a cha. Khizaw he lyu (Kana) eima hro ta moparuna (research-taona) su a cha. Khizaw liata hro chakhy leipa pita, y chakhy tlai mapi.

Moparutuhpa hawhta khatai liata hmo phaleipa yta, nata hmophapa chhao a y; kheihawpa tao aw sala, nata tao lei awpa ma; byhna tona nata to leinazy alaichadai awpa he pavaosa chyupa eima cha. He hawhta alaichadai thaina hro na hnei ma? Acha vei khiah, I-pano lyu siema tla na sie chakhyh?

(2) Rah yzi pahno thei nawpata Kana rah cha kaw chahryh khai ha awpa ahnawpa ama cha (Negeb rah nata tlah rah zydua 13:17). Kana rah he tlah nata by a pahlypa rah a cha. Eima hro khitlyna liata chhutla nata chakha a ypa hawhta a cha. Thadah kawpata by liata khitlyna daihti yta, riethei kawpata chhutla chakha kia-chona daihti a y. Moparutuhpa ngachhihpa cha khitlyna thadah kawna su dei atly leipata, khitlyna riethei kawpa chhao ka beih hra vei.

Na hro khitly rie a thei kawpa chhao ta, byhna a chapie theipa nata a chathie theipa eima zawpakho lei nawpata rah chahryh khaiha (thorough) ha ma y.

(3) Kana rah liata a pahrahpa chyhsa “thatlo nata tlo leizi” moparu awpa a cha (13:18-19).

Kana rah liata a pahra chiehpa chyhsazy adyuh ta ama ra chhu awpa a chapa vata chyhsa duahmo: ama thatlona, ama kudohpa, chhaichhizy cha amo (Israelzy) thatlona nata achhuh awpa a byuh haw. Eima tloh leichaina kao liata eima chariahpa ahri Sata miah a target chai tyh. Chavata moparutuhpa cha ano tloh leina nata a chariahpa tloh leina kyh achu awpa a byuh. Nama kyh na pahno tua awpa cha ta, chariahpa kyh chhao na chu awpa a cha.

(4) Kre (grape) patheina daihti a cha (13:20). Moparutuhpazy ta ama pahno thai awpa

abyuhpa sakha heih cha daihti a cha. Hmo zydua he a daihti nata chha sie yzie ahnei khaipa a cha. Atanoh khizaw he khapa ma a pahahsa chai. Student zy eima cha khiah subject atlyna kyhzy, rai atluatuhpa eima cha khiah rai atlyna kyhzy liata, asiehaipa khizaw chha (daihti) nata ahmiekawpa a tly thai kaw awpa a byuh. Chha yzi a pahno thai leipazy pi he ahru chaipa eina cha tyh he zaw.

(5) A rah chhoh liata theilapa thokha chha vaw phaopa cheingei muh vy. Theilapa ama

phaopa cheingei awpa he cha, pahnokheina (witness) hawhpa a cha. Achupazy eima cha khiah cha Degree zy Certificate zy hawhpa he a cha aw. Moparutuhpa cha hmo a chupa zy cha pahnokheina (witness) ahnei cheingei awpa a cha. Chyhsazy ta ama py thei nawpata achupazy ta degree ama hneipa abyuhpa hawhta raihria/hlaofapa zy chhao ama hriana theilapa ama cha luah awpa ama hnei cheingei awpa a cha.

Rah mohparutuhpa ngachhihpa na cha ma?

Moparutuhpa pahrawhleino zy cha athao tlai eita, hmaohkhata ta, Kana rah cha chahryh eita, biepiepazy hawh tlai ama chakao khai tawhta, Israel zawpi lata vaw kua eita reportna ama vaw hnei. Ama vaw report-na deikua he version sano hawhta a vaw la (13:21-28).

1. Rah hneiroh kawpa rah cha ta, a rah chhoh liata atheilapa cha a ma vaw phaoh (13:27).

2. Chyhsa thatlopa ama cha, ama khihpi chhao lai kawta thokhy (Kudohpa) ahneipha kawpa

ama cha. (13:28-29).

Chahrasala he liana heta, Zawsua nata Kaleba report-zi nata amo hnoh ta asie hrapa mo 10 zy report-zi alyu khao vei. Ama hmona dah a nano haw tahna a cha. Cha ananona kyh eima reih via tua aw. Zawsua nata Kaleba deita he Kana rah tlo thei eita, mo 10 penawh deikua Kana rah tlo thei khao leipa ama cha.

1. Mo 10 penawh he Kana rah bietaina a pietuhpa Khazohpa hmo vei ei. Ama reportna biehmia liata a la vei. Zawsua nata Kaleba deikua cha moparuna liata Khazopa ama hmo, If the Lord is pleased tahpa ta pathao ei ta, Khazohpa moh he report-na liata ama hmah lyma (14:8-10).

Bietaina rah liata luhpa a cha thei awpazy cha moparuna /achuna daihti liata Khazohpa

pahno awpa he apeimawh chai aw. Khazohpa pahno leipata degree nata taka soh hneipa he Kana rah miah tlo khei thei vei tahpa my kha ei suh-u.

2. Mo 10 penawh he ama haipa bie report-na ama hnei (13:32). Biehmeiseihpa nata biedopa ahneileipa ahnei leipa chyhsa he Khazohpa ta chhithatuhpa/luhpa duahmo ta a chaluah tahpa thatih a chu beih ma pi.

3. Mo 10 penawh he amo amohnaona hnei ei ta, amo sasyhta amo hnaona bie “Khawsu” deita eima cha tah eita, chipho hropa pasahsana/china ama hnei (13:33). Na patheisa kawpa cha “Hmozy he apha viapa he chihropa eih, achhie viapazy keimo eih ta eima eima pahawh tyh.”

For instances: Lathlo pha viapa he Viah/Kala-pa eih. Vaopha chi pha viapa cha viahpa,

Bizanampa, Australiapa eih chata, achhie viapa dei Kaliahpa (Marapa) eih a vaw cha hei. Hmiahkhu hmah ta a paha viapa cha Matu eih cha hawta a pahah lei viapa deikua cha Marahmiahkhu tla cha. He hawhpa palohrupa eima hneina he Kana rah eima tlo theilei nawpa sakha a cha aw.

3. Kaleba ta cha “amo tiah awpa ta eima tha a tlo thlah ha mah ta tahpata riahphana ahnei (13:30). Keimo eima hneipa thatlona (potential) hma papua achhuah leipata, mohropa (foreign)baona a bochhana he eima rah raona a cha. Luhpa pakha cha ano sash a pahnieh theipa a cha aw.

4. Mo 10 penawh report-na deikua zawpi buana a tlo khei ta, Khazohpa ama rei pachhie (14:1-4). Khazohpa pahno leipata, zawpi kyhpacha leipata hai bie a reihpa, ano liata ngah-na hnei leipata zawpi a pachhi-parypa zy cha zawpi tyma tlo khei aw eita, zawpi Khazohpa amah mo thei lei nawpata ama mo ama pachao.

5. Zawsua nata Kaleba deikua cha zawpi ta reipachhie kaw eita, alo taihta vaw saopa ama chhuah (14:10). Riepachhiena he chhithatuh hmeiseihpa (dopa) ngiana (sign) sakha tla a cha hri. Chahrasala zawpizy ta ama cho liata Khazohpa amah mo hri haw. Chhithatuh phapa cha zawpizy Khazohpa a pahmosatuhpa ama hmeiseih. Unawh na zaw a hy duahmo liata na y???

Biepachhana

Thluahruapa sai ta, khizaw vaw tly pita, eima laihna (su, lyu, khih nata rah) chhao alyu holo. Chahrasala Kana rah moparutuhpazy hawhta eima topa byhna a vaw lyu tla khao tyh vei. Chyhsapa he chhithatuh/luhpa cha awpata sodypa cha tla vei ei. Eima moparuna khizaw (school, college, company, field) liata eima tyhpa (experience)zy cha Khazohpa mokhao tawhta alaichadaina (analysis, investigation, and research) hawhta a cha via tyh. Acho liata palasa haw chiehpa hmo yzi zy tawhta mopazipata atanoh thyutliapazy khih a vaw deih awpa liata Zawsua nata Kaleba zy Mawsi a thlatuhpazy ama chapa hawhta rah chhihthatuhpa ngachhipa eima cha thei he sermon nawh ngaita he Abeipata byhna bie mawhsy, Amen.

[1] He sermon he Rev. Zodau, President of Bangalore Mara Christian Fellowship ta June 7, 2009 Bangalore Lai Christian Fellowship liata areipa a cha. Original message cha Lai reih ta reipa cha ta, atahma Mara reih ta paliepa a cha.

Khazohpa Chana dopa achuna (The Doctrine of God – Theology Proper) pachhohpa

By Chatlai

1. Biehmia (An Introduction):

Theology cha ‘Khazohpa thatih achuna’¹. a cha. Krizyhpa Theology eima tah khiah cha Krizyhpazy Khazohpa eima pahnodah achuna kha vaw cha ta, zyhna hropazy chhaota amo theology² ama hneichyu thei hra tahna a cha. Zyna hropazy chhaota ama khazohpazy thatih maniah vaw chho thei ei ta, “Khazohpa cha cha hawpa na a cha,” maniah vaw tah ei sala eima Khazohpa achana ei pahnopasia vei khiah cha amo ama reihpa cha zy tlamaw anao kaw aw. Chavata he heta atlahpipa pahnothei n’awpa chata pachhuahpanohpa a cha.

Theology tahpa he Grika reih sano – theos – Khazohpa nata logos – biezy or biereipazy or phuahluahna tahna vaw cha ta, he Grika reih paliena dopa cha, ‘Khazohpa thatih reina tahna a cha, eima pahno thai chaina dah cha Khazohpa achuna a cha.

Cha hawhta, zyna to heta Khazohpa ama pahno dah chyu ama hnei khai eima tah thei hra aw. Muslim Theology nata Krizyhpa Theology cha alyulei kaw, Buddhism, Hinduism, Sikhism, Toaism, Bahai, etc, a y hluh kaw. Chavata Krizyhpazy ta Khazohpa eima tahpa he eima pahno pasia vei khiah cha maniah ama vaw chho tita zo tlamaw anao kaw thei awpa a cha.

Krizyhpa Theology liachhao Khazohpa achuna yta, Sata thatih achuna, Valyuchapazy achuna, Krista thatih achuna, chyhsapa achuna, etc, zy a y pachhuah khai heih. Khazohpa chana dopa achuna cha – Theology Proper – Khazohpa achuna dopa/hmeiseihpa tahpa ta ano eihta achupa a cha. He liata eima chu awpa he Theology proper – the doctrine of God tahpa chhaota reipa cha a cha.

‘Khazohpa cha ahy e?’ tahpa he hiahrina peimawh kawpa cha ta, a pachhoh kawpa ta rei aru kawpa hmo a cha eima tah thei aw. Biehrai liata Khazohpa chana areina he ahluh hmeiseih. Thokhazy pawpalasa ei sila: Khazohpa cha Thlahpa a cha (Zawhana 4:24), Khazohpa cha Khaih-na a cha (1 Zawhana 1:5), Khazohpa cha Kyhpachana a cha ( 1 Zawhana 4:16). Khazohpa cha mei hawhta pakatuhpa (Hebrai 12;29), etc, etc, He eima vaw palasa chiehpazy heta Khazohpa chana achhopaki eima tah thei aw ma? Tah thei aru kaw. A y via chheih thlaha vata.

Khazohpa thatih (Biehrai) achupa (Theologian) hlupi ta chhopasia eita, reih tia leipa aw pita, Westminster Catechism – Westminster liata theologian hlupi apopakhypa zyta pachuna dopazy ama rona liata cha he hawhta sopa a cha. He he keimo ECM, CCIM, MEC, Baptists, Presbyterians, etc (Reformed traditions) nawh ta eima py tlahpipa chhao a cha hra. He hawh ta:

Khazohpa cha “Thlahpa, Chhazaw ypa, anano beihleipa, anoh ta tah a ypa, thaina sona, thatlona, pathaina, ryureidona, phana nata biedopa a cha,” tahpa ta ama soh. ²

Khazohpa chhopasia he hmoru kawpa tlao a cha tahpa achhopasia kaw. Ano cha ano khota a ypa, chyhsa cha ataopa tlao eima cha vata maniah ataotuhpa cha kaw pahno khai aru hmeiseihpa a cha.

2. One God – Khazohpa pakha zie tlai a y? – Monotheism – Khazohpa pakha:

Biehrai ta asiahlia kawpa ta Khazohpa cha pakha dei a y tahpa a reih.

Isai 45:5. – “Keima he Khazohpa ei cha, ahropa y tla vei ei, keima leipa ta Khazohpa hropa y vei ei -

Biehrai liata he he asia kawpa ta ei hluhpi eima hmo thei. Isaiah 43:10; 44:6; 45:14,18, 21, 22; 46:5,9. Zawhana 17:3, 1 Kawrini mozy 8:5-6, Kalatia mozy 4:8-9.

“.. Keima he athaona nata achhana ei cha, keima leipa ta Khazohpa hropa y vei ei.” – Isai 44:6.

“Keima he Abeipa ei cha, ahropa y vei ei, keima leipa ta Khazohpa hropa y vei ei,” – Isai 55:5

3. Khazohpa cha Manoh-Pathoh-pakha (Trinity) Khazohpa a cha:

Chahrasala, Paw, Sawchapawpa nata Thlahpa Pathaipazy cha Khazohpa ama chakhai zie ary liatapazy tawhna heta eima hmo thei:

3.1 Manoh-pathoh-pakha (Trinity) pakhonazy

Chakhiah acho liata palasapazy tawh heta Paw, Sawchapawpa nata Thlahpa Pathaipazy cha Khazohpa hawhta ala khai tlohta kheita Khazoh pathoh ama y tahna ma a cha aw?

Khazohpa cha manoh-pathoh-pakha Khazohpa (Triune God) a cha tahna a cha.

3.2 Khazohpa cha pakha (One God) cha tlohta Manoh-pathoh-pakha a cha theina chhopasiana:

Khazohpa cha a y tahpa angiapa ha pita, Paw, Saw nata Thlahpa Pathaipazy he kheita ama chhokhah dah nata ama raihria dah, Khazohpa ama chakhai ma tahpa hawhpa hiahrina – Khazohpa chana (the nature of God) he eima pacha awpa a peimawh kawpa a cha.

A eih pachaipa ta Biehrai liata bo nata chah liata Manoh-pathohpakha tahpa reihkah hmo awpa y tla tlohleipa ta kheita zie he hawhta Trinity tahpa he Khazohpa chana dopa a chama tahpa cha hiahrina peimawh kawpa tlai a cha hra. Krizyhpenawh pita Khazohpa cha Manoh-pathoh-pakha (Trinity) na a cha eima tahna chhapa cha, Khazohpa ta Paw, Sawchapaw (Zisu) nata Thlahpa pathaipazy ta a chazie Biehrai liata eima hmotheipa nata Saw nata ThlahpaPathaipazy chhao he Paw nata alyu khaipa ama chazie Biehrai ta maniah a pachu vata a cha. He he chhopasia aru kawpa chata, achhopasiana anaona zieta taopa chasala cha Paw ngalah he Khazohpa chasala Zisu nata ThlahpaPathaipazy cha Khazohpa achaleipa ta rei he Muslim (Mosolman) nawhzy ta Khazohpa pakha achhypa tah ei chita pathoh dua nama hnei maniah ama tah tyhna liana heta arai nao kawpa ta eima chhy thei aw. Chasala, Trinity eima chhopasia khiah cha ama no avah aw ta, Khazohpa cha pakha hlata hluviapa chahlei vei – Manoh-pathoh-pakha acha tahpa cha ama pahno pasia thei hra aw.

Khazohpa cha pakha dei y ta, mongyu reih la tawhta he patho-pakha achana chhao he chyhsa reihkah eima hneipa heta chhopasia aru kawpa cha ta, Pakha tah tlo pita patho achapa cha kheita zie raima a cha tahpa he chhopasia aru kawpa rai a cha. Eima chhopasia thailei vata y vei, adovei, chavei eima tah thai n’awpa y hlei vei tahpa kha pahno awpa peimawh kaw aw.

Chakhiah, khazia cha hawhta chhopasia thai lei awpa cha eima py thlah ha? tahpa he hiahrina a y thei awpa a cha. Adokaw. Eima pyna chhapa cha Biehrai liata Khazohpa – Paw hmotaopa momaih cha Sawchapawpa (Bei Zisu) nata Thlahpapathaipa zy chhaota ama tao thlah hra vata tlao a cha. Keimo ta eima khohkaw vata eima tao chhyhpa chavei. Trinity chabie (word) tahpa chhao he Biehrai liata hmo awpa y vei, chasala Khazohpa aphualuah dah a cha vata asia kawpa ta Khazohpa ta pakha dei cha nata atah khaoh chhaota pathoh la ta ala vata he he Trinity tahpa hena eima pahno thai dah nata Khazohpa aphualua dah a cha tahpa ta Krizyhpazy ta eima py khaipa a cha. Apyleipa py thokha cha Krizyhpa cha vei ei, asiechheipa (cult, herery, etc) ama cha tahpa ama hlao tyh.

Biehrai parohpa nata athiehpa liata Khazohpa ta kei he Trinity ei cha tahpa areina ala tla vei, chasala Khazohpa hmotaodah nata raihriadah eima mo khiah cha pakha dei chaleipa ta Pakha na ei chah tah tlota hmo-sathoh la ta tlao ala vata pahno thai n’awpa ta Trinity Khazohpa na a cha, Triune God tahpa ta eima py chyupa tlao a cha. Chyhsa pathoh tahna chaleipa ta Pakha kha pathoh ta a y eima tah awpa a cha aw. Chyhsapa liata he he hmotheipa achalei vata pahnothai aru kaw. Khazohpa chata deikua cha hmotheipa a cha, Biehrai ta a pachu vata. Ary liata eima mo pasia lyma aw.

He Khazohpa thatih achuna he he Theology (Theo- Khazohpa, logia – achuna) la lia cha ‘Khazohpa thatih achuna dopa’ – ‘Theology Proper’ – the Doctrine of God tahpa ta achupa a cha. Khazohpa cha Paw, Sawchapawpa nata Thlahpa Pathaipa Manoh-pathoh-pakha Triune God tahpa ta liahsa asia hliapa ta apy khai chiehpa a cha ba.

Achhopasia: Paw, Sawchapawpa nata Thlahpa Pathaipazy cha Khazohpa tahpa Biehrai liata  palasa khaipa ama cha:

a)      Paw Khazohpa alana thokha: Zawhana 6:27, 1 Pity 1:2

b)      Zisu Krista Sawchapawpa alana thokha – Zawhana 1: 1 & 18, Titu 2:13

c)      ThlahpaPathaipa alana thokha – Hmotaopazy 5:3, 4.

3. 4. Paw Khazohpa nata Sawchapawpa Khazohpa cha Manoh ananopa ama chazie ary liata palasapa liazy heta eima hmo thei:

1. Krista cha Paw nata ama lyleizie a reih: Zawhana 5:32, 37
2. Tuapa nata tuatuhpa ta reipa a cha. Zawhana 10:36, Kalatia 4:4.
3. Sawhneichhohpa nata ahneituhpa ta – Hlazy 2:7, Zawhana 1:14, 3:16).

3.4. Paw nata Sawchapawpa cha Thlahpa Pathaipa tawhta ananopa ama chazie alanazy:

1. Bei Zisu ta Paw nata Thlahpa pathaipa tawhta anano zie a reih. Zawhana 14:16, 17.
2. Thlahpa cha Paw tawhta apuapa a cha – Zawhana 15:26.
3. Thlahpa Pathaipa cha Paw nata Saw ta ama tuapa a cha – Zawhana 14:26, 15:26 nata Kalatia 4:6 zy.

Acho liata palasapazy tawhna khita Khazohpa cha pakha (One God) dei y ta ano deikua Paw, Sawchapawpa nata Thlahpa Pathaipazy cha Khazohpa ama chakhai tahpa palasa ta, chana no-eihpa ahneipa sai ama cha tahna acha heih vata, Khazohpa pakha a y tloh khiah cha Manoh-pathoh-pakha (Trinity) Khazohpa tahpa ta eima py vei khiah cha Khazohpa chana kha eima hmo dah adovei tahna a cha aw. Chavata, chyhsa liata he hawhpa chana he y thei vei, Khazohpa deikua cha angiapapazy chata angiapana ta Abie tah arei ha vata a y thei tahpa ngiapana ta eima pyh. Khazohpa cha ngiapana leipa ta apaloh patla thei rimapa chaleipa ta. (It is impossible to please God without faith) ama tahpa chhao a cha hra. Mathematics asahpa py ahnaipazy cha ta cha pahno thaipa chavei, ama pahno thailei vata adovei tah awpa kha hmo ado leipa a cha aw.

3.5 Trinity Pachuna adoleipazy chhopasiana: (Chyhsa liata cha hmotheipa chavei)

1. He Manoh-pathoh pakha he buakha apalana chaleipta ta chhazaw ta a y thlahapa acha zie Biehrai ta a reih.

1. Biehrai ta Bie (Word- Zisu reina) cha khizaw athaona tawhta Paw hawhta a yzie a reih. Zawhana 1:1, 2, Philipi mozy 2:6.
2. Biehrai ta Krista cha athaona tawhta a yzie reina – Zawhana 1:18, 8:58, Kaolaosa mozy 1:15-17.
3. Saw nata Paw khizaw padua hlata ama ykhohzie reina – Zawhana 17:5, 24.
4. Khizaw cha Zisu Krista (Khazohpa achana reina) taopa a cha – Zawhana 1:3, 1 Kawrini mozy 8:6, Kawlaosa mozy 1:16 nata Hebrai mozy 1:2, 10.
5. Thlahpa Pathaipa chhazaw taihta a yhrana reina – Athaona 1:2, Hlazy 33:6, Hebrai mozy 9:14.

Manoh-Pathoh-Pakha (Trinity) he Khazohpa pathoh a y tahna cha vei. He he ama pahno chhei chai tyhna a cha hra. Pathoh hawhta alyu thlahpa he chyhsa eima reihkah ta adaih lei va chhao tlao a cha hri. Chyhsa pakha pathohpa he ybeih leipa pita, Khazohpa deikua cha a y vata, chyhsa ta eima reih n’awpa eima pahno lei va tlao a cha. Pathoh hawhta alapa alyu nota Pakha dei a cha.

1. Khazohpa Chyhsa eima tah nota eima nuapa cha Paw, Saw nata Thlahpa Pathaipazy reina cha ta pakha chyu hawhta reih hra ei sila chyhsa pathoh Pawla, Pity nata Zawhana pathoh eima reihna hawhta cha vei. Reihkah hropa chyhsa manoh pathoh-pakha ano eihta reina he eima hneilei vata tlao a cha. Chyhsapa reihkah liata y vei. Pakha cha ta, pathoh hawhta rai hria ta, y hra ta, alahra ta, a cha hra. Cha cha Khazohpa a cha. Chyhsa hawhta kha pacha eima chhuah vata Pakha Pathoh kheita a cha thai aw tahpa ta pachana maniah apie chyu chyupa a cha.
2. Khazohpa Manoh-pathoh-pakha eima tahno he ta Khazohpa achapa Paw, Saw nata Thlahpa Pathaipazy cha pachhaithaipa chavei ei. Paw dei he Khazohpa tahpa chhopasiana kha aki thei vei, Sawchapawpa nata Thlahpa Pathaipa chhaota Khazohpa eima tahpa kha atloh tahna a cha. Acho liata bo nata chah eima rei chiehpazy khata achhopasia kaw.

3.6. Manoh Pathoh pakha pazy he ama lyu (The three persons are equal):

1. Khazohpa chana cha ama cho liata a y chyu:
   1. Paw ngalah ta Khazohpa chaleipa ta, Khazohpa cha Paw, Saw nata Thlahpa Pathaipa a cha. Paw tahpa ta achhopasiapa chhao cha Khazohpa aphuahluah dah ananona manoh pakha kha a cha. Paw tahpa ngalah heta Khazohpa chana kha aki vei tahna a cha.
   2. Sawchapaw ngalah ta Khazohpa chahraleipa ta, Paw nata Sawchapawpa chhaota a cha. Saw cha Paw tawhta ananona cha ta, ano cha Paw ta Khizaw pachha/chatlai awpa ta atuapa a cha. Cha tawhta Paw nata Sawchapawpa ta Thlahpa Pathaipa chhao atuahpa hra.
   3. Thlahpa-Pathaipa cha ano ngala/ ano eihta Khazohpa chahraleipa ta, Paw nata Saw chhao ta Khazohpa a cha. Ano chhao cha Paw nata Saw tawhta pananopa a cha heih tlo hra vata ananopa (distinct) manoh a cha hra, Paw nata Sawchapawpa ta ama tuapa a cha.
2. He mohchhoh sathohzy he ahma dah dopa liata hma awpa chi a cha aw:

Paw, Sawchapawpa nata Thlahpa-Pathaipazy cha chyhsa (keimo) la ta pakhona ta eima rei khiah cha Pawla, Pity nata Zawhana chyhsa pathoh hawhta rei tlamaw anao kaw aw, kha hawhta chahlei vei tahpa pahno awpa a cha.

3.7. Atlahpakyna:

Pahno awpa abyuh kawpa, apeimawh kawpa cha Biehrai a zydua ta mopa ta Trinity cha asiakawpa ta ala tahpa he a cha, Biehrai tlahkah/chahkha ngala mopa ta chaleipa ta a ualua ta mopa ta ala tahna a cha. Apakhopana alyu kawpa cha daihti he hmapa cha mawhla akhochiehpa, asiangahaipa nata avaw y heih awpa he daihti sakha reina achapa hawhta eima tah thei aw, Paw cha y khaovei tahna deikua chavei, pakhopana ta chhopasia khai thai leipa dei he Khazohpa chana cha Biehrai ta maniah achhopa a cha.

Paw deita ta Khazohpa chaleipa ta, Zisu Krista deita ta Khazopa chahravei, Thlahpa Pathaipa deita cha hravei, kha manoh-pathoh khata Khazohpa pakha tlao a cha. Chavata, Mara reih lia chhaota chyhsa patho-pakha tah leipa pita, manoh-pathoh-pakha eima tahpa a cha, eima pahno thai via n’awpa ta he he eima hma tyhpa a cha. Chyhsa pathoh pakha chaleipa ta, pakha manoh pathoh tlao a cha tahna a cha. Chavata, Zisu cha Khazohpa a cha tahpa tlyma, Paw Cha Khazohpa a cha, tahpa nata Thlahpa Pathaipa cha Khazohpa a cha tahpa reihkah zy cha ado khai thlah tarawpa ta, pakha ngalah ta Khazohpa chavei tahpa kha eima sia awpa a peimawh kawpa a cha hra.

Notes:

1. 1. Khazohpa chana ngala dei khata hiahrina eima hneihluh kaw aw, achhapa cha Abeipa Zisu Krista chana ta Khazohpa chana kha thata biehneina ahnei vata, Krista thatih achuna (Christology) chyupa tahpa chhao tao heihpa cha ta, cha chhao cha reih heih ma y. Cha hawh ta, Thlahpa Pathaipa Thatih achuna (Pneumatology – the doctrine of the Holy Spirit) chhao Khazohpa acha zie rei pakawhna chhao ano-eih ta tao heih hrapa a cha. Rei pazao lyma awpa a cha aw.
   2. Hiahrina zydua cha comment liata liata paphao lyma theipa a cha aw.

References:

1. 1. Christian Theology [Grand Rapids, MI: Baker, 2001], 22.
   2. The Greek-English Lexicon, Lidell and Scott.
   3. The Westminster Shorter Catechism, A.D. 1647 [online: epc.org]
   4. Systematic Theology: An Introduction to Biblical Doctrine, Wayne Grudem, Zondervan 1995.
   5. Christian Theology, by Millard J. Erickson, Baker Academic, 1998
   6. Introducing Christian Doctrine (2nd Edition), Millard J. Erickson, Baker Academic, 2001.
   7. The Trinity, Christian Apologetics and Research Ministry online, Matthew J. Slick 2002.
   8. Systematic Theology, Louis Berkhof, Wm. B. Eerdmans Pub. Company, 1996

Dr. Sasa graduation nothlahpa

Armenia liana heta Dr. Sasa hleikhota Mara laihsa pano nata Satlia pakha zy chhao ama y.  Mara Laihsa panopazy chhaota nothlah ama la khohna ary liata:

Mara Laihsa Medical students in Armenia

Chavei lapa he Laihsa Mary Chozah chata, chachah lapa he Laihsa Kiki Azyu a cha.

Nothlah hluhvia cha Photogallery(Maraland.net )  liata hmotheipa a cha.

Ary liata palasapazy he achhypa ta apazao (join) awpa a cha. Chazy cha:

1. Moh hmeiseihpa :
2. Moh aw dah :
3. Atahma yna:
4. Mararah liata khih moh:
5. Atahma hmo na tao haipa (rai ei hria, siku hawti ei cha, etc):
6. Chakaona liata chana (eg. Reverend/Pastor, Macha, Khichhoh Macha, Nopy chhituhpa, nata ahropazy abyuhna hawhta):
7. Khazohpa bie na thyu thei nata thyu theilei (Speaker): U (yes) or  U u (No).
8. Trinity na pyh nata pylei (na pahno vei khiah cha pei vei) : U (yes) or  U u (No).

Acho liatapazy khi copy la achhyna pabie la ary liata email ID liana heta paphao ma y:

marachristians@yahoogroups.com

He Awnanopa sachakipazy heta ama zydua pahlypa ta 8,49,962 cha ei ta, 4,23,149 chapaw nata 4,26,813 chanozy ama cha, chano he 4,736 tlaita ama hluhvia.

Ahropenawh Congregational Church of India (Maraland), Presbyterian Church of Maraland, MADC area liapa nata su hrolata Awnanopa hluhpi palasapa chahlei vei ei.  Source: Chhawkhlei.com

Mizoram state lia he malu 10 lakh (one million) hleita eima y ngahaipa a cha.

On 25 January, 2009 Sunday time 1:00pm Liata Malaysia Mara sawzy duata 2009 – 2010 MCF chhithatupa zy lupa election taopa chata alykawpata atlatlo ngasa pata eima election zychhao apha ngasa pata eima vawtao khai haw. Aly achhikaw. MCF chhitupa zy ama mo nata khimo zy a ry la liata eivaw ro.

1. Chairman – Tlauchhau – Ngephepi
2. Vice-Chairman -Laithie – Pote ( B )
3. Secretary – Hrato – Chakhai
4. Asist secretary- Valua – Locheipi
5. Treasure – Hranau – Sabyhta
6. Finance / Sec- C.Valua – Phaphe
7. Auditor – Aungkyaw Oo- Lelai
8.Auditor – Thlabie – Ngephesizo

MCF- Executive member zy–

1. Khai U – Lelai
2. Tleko – Pote ( B )
3. VaTu – Pote ( B )
4. Se Hu – Sabyhpi
5. Valoh – Ngephepi
6. Tha Tlei – Taula
7. Beihmo – Meisakotla
8. Zochho – Locheita
9. Kelai – Locheita
10.Makau – Tisi
11.NgoMau- Teina
12.PeKhai – Lelaita
13.Ramawna – Aru
14.Beirahthie – Sabyhpi
15.Ve Mau – Chali
16.Bei Li – Pamai
17.Silai – Ngephe Sizo
18.Hmo Tha- Ngephe Sizo
19.Vahnei – Lelaipi
20.Beizakhu – Rari
21.Freza – Sosai
22.Beisa – Sabyhpi
23.L.Beisaw – Chakhai

MCF- Advisor zy–

1. Nei U – Lelai
2. Bei Thao – Ngephe Sizo
3. Lechai – Sabyhpi
4. Kha U – Lelai
5. Zako – Locheipi

Acho lata eivawropa chhitupa nawzy he 2009- 2010 taita Mara Christian Fellowship ( MCF ) chhitupa zy ama cha tapa thati asia kawpata eicha vaw chho. Malaysia Mara sawzy ama chhithapha via lyma thei naw pata ABEIPA liata nama thlachhana liata nama vaw thei cho bie awh pata anaona asa chaipata eicha haw ei. Aly kheina chota.

Krista liata nama chakao lapa,

Rev. John Byhna
Mara Christian Fellowship
Galilee International Church
Mission Centre for Southeast Asia,
Kuala Lumpur, Malaysia